Es eleccions municipaus en Arres

14/05/2019

Eth municipi d’Arres, plaçat en terçon de Lairissa e format pes pòbles d’Arres de Jos e Arres de Sus, ei eth municipi mens poblat de tota era Val d’Aran damb un totau de 63 abitants.

Damb ua extension de mens de 12 km² e ua nautada de 1276 mètres, compde damb un des nuclèus mès antics d’Aran, eth sòn cap-lòc, Arres de Jos.

Un municipi a on era ramaderia ei fòrça present e que compde damb grani atractius toristics coma es sues espectaculars vistes, era Bassa d’Arres e es Mines Victòria, visitables en ostiu.

Enes eleccions municipaus de dimenge, 26 de mai, es vesins e vesies d’Arres son cridadi as urnes entà escuélher as qui vòlen que siguen es sòns representants politics entàs pròplèus quate ans.

Enes darrères eleccions, eth grop politic Convergéncia democratica Aranesa (CdA) artenhec dus còssos e eth Partit Popular (PP) un.

Enguan, er actuau baile, Pedro Castet, se presente ara reeleccion damb CdA, amassa damb era sua equipa, conformada per Antonio Rella e Silvia Castet.

Unitat d’Aran (UA) apòste peth candidat Dani Castet e era sua dusau Soraya Castet.

Pera sua part, eth PP non presente candidatura.

Dempús d’aguest 26 de mai donques, quede clar que, coma minim, era composicion der Ajuntament d’Arres cambiarà en pèrder aguest còsso deth PP. Mancarà demorar entà saber se i a bèra sorpresa mès.

Clara Villar