Es alumnes dera Escòla Ruda se somèren as reivindicacions pera igualtat deth 8-M

14/03/2019

Es alumnes de cicle miei e superior dera Escòla Ruda de Salardú se somèren, eth passat diuendres 8 de març, ara reivindicacion pera igualtat en commemoracion deth Dia Internacionau dera Hemna.

Entà hèr-les particeps d’aguesta luta, e laguens d’un projècte d’etica que dejà portauen setmanes premanint, era escòla organizèc ua jornada plan intensa damb formacion sus masclisme e feminisme damb posterior manifestacion pes carrèrs deth pòble.

Laguens d’aguest projècte, es mainades e mainatges der estudi trebalhèren ahèrs coma era reparticion des prètzhèts deth larèr, era discriminacion que i a entre ambdús genres en çò que tanh as joguets e es colors o es ròtles des personatges masculins e femenins enes condes o pellicules.

Ua activitat mès que se somèc as realizades pendent tot eth dia ena rèsta deth territòri, a on ath delà des actes institucionaus deuant dera sedença deth Conselh Generau d’Aran, eth Sindicat d’Estudiants der Institut d’Aran convoquèc ua grèva damb fòrça participacion, atau coma un collòqui feminista organizat amassa per Taula per Aran.

Clara Villar