Era preinscripcion des ensenhaments obligatòris se realizarà deth 13 ath 24 d'abriu

07/03/2018

Coma nauetat, i aurà era preinscripcion electronica enes ensenhaments postobligatòris, coma son es cicles formatius de grad superior dera FP

Era preinscripcion des ensenhaments de dusau cicle d'educacion infantila, primària e segondària obligatòria se poderà realizar deth 13 ath 24 d’abriu. D’aguesta manèra, eth Departament d’Ensenhament redusís eth calendari deth procès de preinscripcion lèu un mes, a compdar qu’era família presente era sollicitud enquia que coneish eth centre en qu’a obtengut era plaça, d’acòrd damb era peticion reïterada de desparièrs sectors dera comunitat educativa.

Eth hèt de començar era preinscripcion mès tard en relacion ath cors anterior, ath delà dera reduccion deth calendari, permeterà era diminucion des incidéncies causades pes peticions d’alumnes nauvengudi o d’auti que se troben en situacions de cambiaments, com per exemple, cambiaments de localitat de residéncia. En comprimir eth periòde, part d’aguestes situacions se resolveràn de manèra ordinària e ja no s’auràn de tractar coma sollicituds presentades dehòra de termini. Era reduccion deth procès non afècte ara durada deth termini de preinscripcion –que se manten damb apruprètz es madeishi dies qu’er an passat-, ne tanpòc ath de matriculacion des famílies.

Ei de besonh destacar qu’aguesta reduccion deth calendari s’a podut amiar a tèrme en bona part gràcies as naui programes informàtics de registre d’alumnes, de gestion d’admission d’alumnes e de gestion administrativa e economica de centres, pr’amor qu’an comportat ua màger integracion de donades atau coma ua automatizacion deth sòn tractament, qu’a permetut era optimizacion de quauqui des procèssi de preinscripcion.

Nauetat enes ensenhaments postobligatòris

Enguan s’incorpòre, coma nauetat, era preinscripcion electronica enes cicles formatius de grad superior d'FP, que compòrte era possibilitat de formular telematicamens era sollicitud, sense besonh de tramit presenciau. Tanpòc calerà aportar documentacion en papèr d’aqueres donades qu’era administracion ja dispòse. Ei eth prumèr pas en rèpte dera administracion electronica e era entrada necessària en procès de preinscripcion.

Manu Moga