Er Espitau Val d'Aran da era alta ath sòn darrèr pacient ingressat per Covid-19

15/05/2020

Era Val d’Aran s’a desvelhat aué damb era milhor des notícies: er Espitau deth parçan a barrat era planta d’ospitalizacion destinada ara COVID-19.

Un barrament que s’a produsit dempús de qu’eth darrèr pacient der Espitau Val d’Aran ingressat per Coronavirus arrecebesse ager era alta ospitalària.

A despiet d’açò e a mòde de prevencion, er Espitau Val d’Aran reservarà era zòna d’ingrès sociosanitari entàs possibles casi que poguen aparéisher en cas de rebròt dera malautia

Aguesta bona evolucion que s’a dat en nòste país a hèt possible era entrada d’Aran ara fasa 1 des deth passat deluns. Boni resultats, mès des dera administracion aranesa se demane que non se pòt baishar era guàrdia. 

Arrebrembam que des deth passat mes de març, s’an confirmat ena Val d’Aran un totau de 125 casi de Coronavirus

D’aguesti, 90 s’an detectat a trauès dera pròva PCR, qu’identifique era infeccion, e 35 mès a trauès des test serologics aqueridi peth Conselh Generau, que detecten es persones qu’an desvolopat anticòssi.

Laura Rodríguez