Es òbres de remodelament dera Plaça d’Aran de Vielha, a on se trape era Sala Polivalenta e eth Conselh Generau d'Aran, ja an començat entà dignificar aguest iconic endret deth cap-lòc aranés.

Aguestes òbres se realizen en basa ath convèni signat er an 1992, en qué er Ajuntament cedic era anciana Casa Saforcada coma sedença administrativa tath Conselh, damb eth compromís qu'era maximala institucion aranesa melhorèsse er estat d'aguesta plaça.

Es trabalhs consistiràn en er asfaltament deth solèr, en tot rebaishar eth nivèu dera plaça enquiara sala polivalenta, ena eliminacion des barrères arquitectoniques e ena adeqüacion des servicis.

En çò que tanh ath finançament dera naua plaça, es administracions deth Conselh Generau d’Aran e der Ajuntament de Vielha an artenhut un acòrd de collaboracion.

Totun, un aute des aspèctes de melhora dera plaça ei era sua adaptacion as persones que patissen bèth tipe de minusvalía, en tot installar rampes entà facilitar er accès.

Se preve que tà seteme es òbres agen acabat, e atau se pogue inaugurar era naua plaça damb es hèstes majors de Vielha.