Conselh Generau d'Aran: un darrèr plen mercat peth balanç dera legislatura

30/04/2019

Dejà s’a celebrat eth darrèr plen ordinari dera legislatura deth Conselh Generau d’Aran. Un exercici excepcionau derivat dera situacion politica de Catalonha en relacion damb er Estat Espanhòu. Quauquarren qu’a afectat ath desplegament dera lei d’Aran.

Entre d'auti ahèrs, eth plen deth Conselh Generau a aprovat er inici der expedient de modificacion deth contracte mixte de Gestion integrau dera recuelhuda e evacuacion de lordères. Ua mesura que preten melhorar era sua efectivitat e que comportarà era creacion d'ua linha especifica entara recuelhuda selectiva.

Pr’amor que pendent era darrèra sason d’iuèrn, s’a tornat a meter en evidéncia era feblesa enes punts de recuelhuda dera fraccion selectiva. Aquieu, eth carton, eth veire e eth plastic acabauen en tot desbordar-se.

D’auta banda, aguest darrèr plen deth Conselh a estat mercat peth balanç qu’es liders dera oposicion an realizat sus era legislatura.

Tanben a hèt balanç eth Sindic d’Aran, en tot arrebrembar era excepcionau situacion que s’està en tot víuer en Catalonha.

Un plen en que s’a acomiadat ath veteran de CDA Francés Medan, que dejà non presentarà candidatura coma conselhèr tara pròplèu legislatura.

Fin finau, arrebrembam qu’eth dimenge 26 de mai, en tot coincidir damb es eleccions municipaus, aurà lòc tanben era eleccion des conselhèrs deth govèrn d’Aran.

Laura Rodríguez