Era Val d'Aran a enregistrat 5 naui casi positius de Coronavirus, confirmadi a trauès dera pròva PCR. Es infectadi se trapen en isolament domiciliari.

En aguesti moments, es professionaus sanitaris der Espitau Val d’Aran realizen eth seguiment des contactes des cinc naui confirmadi e non se descarte que i age mès casi positius.

Actuaument, eth totau de casi de COVID-19 confirmadi en Aran ei de 177: 103 detectadi a trauès dera pròva PCR (qu’identifique era infeccion) e 74 a trauès des pròves immunologiques.

Eth govèrn deth Conselh Generau d’Aran torne a demanar responsabilitat e prudéncia ara ciutadania entà esvitar un nau rebròt, que pòt auer conseqüéncies nefastes entara sanitat e economia araneses.

HÒNT: CONSELH GENERAU D'ARAN