Bossòst, en plena celebracion dera sua Setmana Santa

20/04/2019

Un an mès, era processon deth Via Crucis de Bossòst a compdat damb ua excellenta acuelhuda tant per part des vesins coma des visitants, que non s’an volut pèrder er encant e era magia d’aguesta tradicion unica en país.

Damb era participacion de mès de 200 persones, era Setmana Santa de Bossòst ei dejà un simbèu d’unitat e frairesa en municipi.

Es dus passi mès naui, eth deth Crist dera Esperança e eth dera Mair de Diu dera Misericòrdia, aguest darrèr portat integralaments per hemnes, an estat dejà consolidats en acte. Mès enguan tanben s’a compdat damb bèra nauetat.

Cau soslinhar era nauta participacion e compromís enes processons de Bossòst per part des joeni, que damb orgulh decidissen implicar-se en aguest acte religiós e culturau.

Pr’amor qu’er esfòrç non sonque se trape ena participacion enes processons: non cau desbrembar eth sacrifici des dies prèvis, a on es participaires assagen damb illusion.

Ua processon que cada viatge desvelhe mès er interès per part des visitants.

Era processon deth Via Crucis a demostrat, un aute viatge, èster un des actes principaus deth pòble de Bossòst, en tot mostrar era sua magia entà amassar a tot un pòble.

Laura Rodríguez