Eth maximal circuit de snowboardcross (SBX) internacionau, era Copa deth Mon FIS, visitarà era estacion de Baqueira Beret era dimenjada der 1 e 2 de març.

Aguest eveniment arribarà ara Val d’Aran dempús de passar pes estacions de Cervinia (Itàlia) e Feldberg (Alemanha) e era sua pròva finau se celebrarà ena ciutat soïssa de Veysonnaz eth pròplèu 16 de març.

Era estacion de Baquèira Beret a desplegat un dispositiu de trabalh entà bastir un circuit ara nautada d’aguesta competicion.

A compdar deth 25 d’hereuèr començaràn a arribar ara Val d’Aran es 200 integrants deth FIS entre esportistes, entrenadors e tecnics. Ara sua arribada, eth circuit dejà serà practicaments acabat dempús d’un mes de trebalh.

Eth dia dera corsa mès de 100 persones auràn intervengut ena pista en tot hèr possible un eveniment que requerís ua grana preparacion e coordinacion de recorsi umans.

Es maquinistes dera estacion destinen ues 500 ores ad aguest circuit, que dejà perfile eth shaper nòrd-american de Copa deth Mon FIS, Nick Roma.

En an 2016, eth prumèr en que Baqueira acuelhec aguesta competicion, se botgèren 30.000 mètres cubics de nhèu entà possibilitar er eveniment.

Plaçat ena zòna de Blanhiblar, ena pista Boardercross, eth recorregut compdarà damb sauts, subbies e peralts ath long d’un quilomètre de longitud. Era carrèra aurà un desnivèu de 115 mètres e i aurà ua equipa medicau complèta entara atencion as competidors.

IMATGES: BAQUEIRA-BERET