Arribe un nau mamograf ar Espitau dera Val d’Aran

23/07/2019

Ei prevista era arribada ar Espitau dera Val d’Aran d’un nau mamograf que forme part dera donacion qu’a hèt er empresari Amancio Ortega ara sanitat publica der Estat.

Se tracte d’ua maquina de darrèra generacion, damb un sistèma de Biòpsia Digitau Verticau que permet ampliar er emplec deth mamograf tà pròves de biòpsia, en tot milhorar es tempsi de realizacion deth procediment e garantint ua totau fiabilitat diagnostica.

Ath delà, aguest nau esturment compde damb ua estacion de diagnostic multimodalitat que supòrte aplicacions auançades coma era tomosintèsi.

Se demore qu’eth nau mamograf sigue installat pendent es prumèri dies d’agost. Eth personau sanitari corresponent aurà de besonh hèr formacion entà conéisher eth sòn foncionament e poder emplegar-lo.

Aguest esturment substituirà er actuau mamograf qu’a er Espitau de Vielha des der an 2002, apuprètz, e que siguec ua donacion deth Club Soroptimist International dera Val d’Aran, artenhut gràcies as sues accions solidàries

Eth Club Soroptimist tostemp a trebalhat tà contribuïr en fòrça projèctes sociaus, era majoria d’eri destinadi ar airau de sanitat en Aran, mès tanben en d’auti airaus coma era joenessa deth país. Eth sòn trabalh generós e altruïsta ei força important entath conjunt deth territòrri.

HÒNT: CONSELH GENERAU D'ARAN

 

Laura Rodríguez