Arribe deseme damb nhèu e heired

01/12/2017

Eth prumèr dia de desembre arribe ena Val d’Aran damb ua bona nheuada e fòrça heired. Ua nhèu que comencèc a quèir dijaus damb mens intensitat mès que, da cara ara dimenjada, contunharà damb mès fòrça e poderie deishar mès de 50 cm en còtes nautes de Baqueira, segontes afirme eth servici de meteorologia, Meteo Aran.

Per ara, ei obligatòri er emplec des shènes tant en Pòrt de la Bonaigua, coma ena c-142 B entre Baqueira e eth Pla de Beret.

Pendent tot eth dia d’aué se demore un cèu embromat e nheuades moderades ath long deth territòri, qu’anaràn guanhant intensitat a darrères ores. Es temperatures oscillaràn entre es -4 e es 3 grads e se preven acumulacions  d’entre 35 e 45 cm en còtes nautes.

Entà dissabte, contunhen es nheuades moderades en totes es còtes, e se demore que vagen remetent damb eth pas des ores. Acumulacions d’entre 10 e 15 cm e temperatures encara mès heiredes damb -5 grads de minima e 1 de maxima.

Dimenge se demore ua jornada magnifica damb solei e temperatures entre es -6 e es 5 grads, un dia perfècte entà gaudir des 120 km esquiables que Baqueira-Beret meterà en foncionament deman madeish.

Sense dubte, aguestes nheuades auguren qu’era Val d’Aran se traparà en ues condicions fantastiques entà arrecéber a toti es sòns visitants pendent eth pònt de deseme.

Clara Villar