Era enterpresa aranesa Arantec, distinguida damb er ANYWHERE Innovation Challenge eth darrèr mes de març en Soïssa, participe enquia aué en Meteorological Technology World Expo 2018 en Amsterdam, era expo mondiau de tecnologia meteorologica a on presente es naues solucions Smarty Planet.

Rebrembam qu'Arantec Engineering, qu'ei formada per un grop d'enginhèrs, programaires e dessenhaires, ei especializada en hilats de sensors inalambrics (WSN) ath servici des Smart Cities e comercialize jos era mèrca Smarty Planet non sonque solucions complètes de monitorizacion e telecontròl, dessenhades entàs besonhs de desparièrs sectors, coma, òbres idrauliques, carretères, ciutats intelligentes, agricultura, aeropòrts e camins de hèr, senon tanben entath Internet des Causes (IOT).

Es estacions de sensors Smarty Planet son solucions de monitorizacion e telecontròl dessenhades especificaments entà cabaus e arrius (Smarty River), monitorizacion dera nhèu (Smarty Snow), quantitat e qualitat dera aigua (Smarty Water), estacions meteorologiques (Smarty Meteo), contròl d'incendis forestaus (Smarty Forest), qualitat acostica e ambientau (Smarty Sound) e qualitat der aire (Smarty Air).

Ua des solucions innovadores qu'Arantec presente en aguesta edicion de Meteorological 2018 ei er nomentat "Smarty Flow", consistent en un radar doppler que mesure nivèu e velocitat, e per tant cabau, sense contacte damb er aigua. Ua equipa que s'adapte tant ara medicion de captacions de hònts naturaus en lamina liura coma colectors de provediment e sanejament.

IMATGE: CONSELH GENERAU D'ARAN