Era Val d’Aran a tornat a respóner damb exit ara crida dera naua Maraton de Donacion de Sang, celebrada eth passat dissabte dia 10 de noveme en Palai d’Espòrts de Vielha coma dejà ei abituau, en orari des 11 deth maitin enquias 10 deth ser sense interrupcion.

A diari eth Banc de Sang distribuís uns 1.000 productes sanguinis (plasma fresc, concentrats d’hematies e concentrats de plaquetes) as espitaus de Catalunya, sustot entà casi d’anèmia aguda o cronica, intervencions quirurgiques, tractaments oncologics e accidents grèus. Era sang e es sòns components an ua vida limitada e, per tant, entà assegurar-ne un estòc, cau qu’era donacion se convertisque en un abit.

Enguan s’an remassat mès de 130 bosses de sang, ua donada mès baisha que pendent d’autes maratons, mès que mòstre eth compromís des vesins e vesies d’Aran damb aguesta causa.

Era Associacion de Donants de Sang organizèc un sorteig entre es donants damb diferents productes, ath delà de diuèrses activitats entàs mès petits qu’acompanhèren as sòns pairs e mairs.

Ei imprescindible mantier es donacions e a poder èster augmentar-les entà arribar a hèr front a toti es besonhs deth dia a dia des espitaus atau coma as possibles situacions d’emergéncia. Era donacion non compòrte cap risc entara salut deth donant e sonque demane ues menutes deth nòste temps. Pòt donar sang tota persona sana d’entre 18 e 70 ans e que pese mès de 50 quilòs.