Baqueira/Beret dejà a daurit es sues pòrtes en tot estrear era naua sason d’iuèrn. Un des dies mès demoradi entàs aranesi e apassionadi dera nhèu, qu’an pogut gaudir de 27 quilomètres esquiables e d’ues excellentes condicions dera nhèu de Baqueira.

Ua sason que comence dempús des trabalhs de melhores amiadi a tèrme pendent es darrèri mesi e qu’an compdat damb ua inversion de mès de 7 milions d’èuros.

Segontes hònts dera estacion d’esquí aranesa, ues 2.000 persones utilizèren es installacions de Baqueira pendent eth sòn prumèr dia dera sason. Uns usatgèrs que satisferen es sues descomunaus ganes de retrobar-se damb es sensacions des espòrts de nhèu.

E es ganes de Baqueira/Beret èren tan granes que bèri uns tanpòc an dobtat en pujar a Baqueira tot e non auer premanit encara eth materiau d’esquí.

Damb mès de 30 centimètres de nhèu enes còtes mès nautes, Baqueira ja trabalhe sense parar entà daurir mès telesères en aguest pònt dera Purissima.