Vielha e Mijaran constituís eth Conselh dera Vila

01/03/2019

Pendent era jornada deth deluns passat, eth municipi de Vielha e Mijaran a celebrat era prumèra amassada oficiau deth Conselh dera Vila, qu'ei eth maxim òrgan de participacion ciutadana, e que preten establir ua vinculacion dirècta entre era administracion e es vesins e vesies deth municipi.

En aguest sens, ena amassada i a agut era preséncia d'ua representacion fòrça important dera societat entà parlar d'aqueri ahèrs que mès preocupen ara ciutadania deth municipi. Eth Conselh dera Vila a previst amassar-se periodicament en tot èster presidit peth baile municipau, e qu'ei conformat per ua representacion des diuèrsi sectors sociaus, culturaus e economics deth municipi designadi peth baile, e per un maxim de 8 membres que de manèra individuau demanen formar-ne part.

Eth Conselh dera Vila a coma objectiu fomentar eth debat sus es qüestions mès relheuants deth municipi a trauès d’un òrgan democratic de consulta damb era participacion de representants dera societat civila municipau. Entre es sues foncions i son debàter e prebotjar estudis e prepauses estrategiques d’interés entath municipi de Vielha e Mijaran, atau coma informar e recéber informacion de caractèr municipau.

HÒNT: AJUNTAMENT DE VIELHA E MIJARAN

Laura Rodríguez