Vielha dispausarà d'ua naua connexion internacionau dirècta en bus damb es ciutats de Toulouse, Montpellier, Nîmes e Lyon a compdar de noveme

28/10/2019

Vielha dispausarà a compdar deth pròplèu mes de noveme d'ua naua linha de bus internacionau. Eth màger operador europèu de linhes regulares d'autobús de longa distància, FlixBus, a includit Vielha ena linha nocturna N748 que connècte eth caplòc aranés damb Lyon.

En aguest sens, Vielha aurà ua parada ena Avenguda Calbetó Barra (enes marquesines plaçades en ambdús costats dera via), a on actuaument i a abilitada era parada entàs servicis intèrns e tanben enes viatges ena linha Lleida-Barcelona. Era arribada prevista en Vielha des de França s'efectuarà entàs 01:35, mentre qu'era gessuda tà Toulouse, Montpellier, Nîmes e Lyon s'amiarà a tèrme entàs 04:00 dera net

Era crompa deth bilhet d'autobús entà quinsevolh des dus trajèctes se poderà realizar a trauès der operador Flixbus. Aguesta companhia permet reservar eth bilhet online ena plana web www.flixbus.es, ena app oficiau, o aquerir-les en madeish autobús. Atau madeish, tanben ei disponible era possibilitat de reservar eth bilhet ena agéncia Naut Viajes, plaçada ena Avenguda Pas d'Arró 11, e en Viajes Occitania, plaçada en Carrèr Castèth 3.

Entà obtier mès informacion sus era linha d'autobús en question, atau coma era crompa des bilhets o es oraris concrèts de parada des trajèctes, podetz visitar era plana web www.flixbus.es

“Des der Ajuntament de Vielha e Mijaran èm fòrça satisfèts de poder anonciar er establiment d'aguesta parada d'autobús en Vielha en ua linha internacionau. Ei ua grana escasença entà apropar-mos a d'autes ciutats europèes, en tot èster ua linha qu'amasse ciutats fòrça importants de França", comente eth baile de Vielha e Mijaran e conselhèr de torisme e promocion economica dera Val d'Aran, Juan Antonio Serrano.

HÒNT: AJUNTAMENT DE VIELHA E  MIJARAN


Laura Rodríguez