Unitat d'Aran denóncie aué, mejançant un comunicat oficiau, ua naua retalhada de professorat enes escòles araneses. 

Hè pòc se coneishie qu’er Institut d’Aran non poderie daurir ua quatau linha de prumèr d’ESO, "hèt que provocarà qu’era ratio des classes sigue fòrça nauta, d’ath torn de 29 alumnes per classa, tath cors 2018-2019" afirmen des deth partit. Aguesta retalhada se hig as que dejà a patit eth centre en çò que tanh as cicles formatius.

Er Institut, qu'en principi compdaue damb un centenat d'escolans de 1èr d'ESO matriculadi entath curs 2018-2019, ath finau n'aurà 84, chifra qu’acostume a aumentar un viatge iniciat eth curs. Per aguest motiu, eth Departament d’Ensenhament dera Generalitat a descartat era possibilitat de daurir ua quatau linha en tot suprimir es dues places qu’en un principi i auie destinat.

Er Institut non ei pas er unic centre aranés que se ve afectat per aguestes retalhades: "era Escòla Garona, eth centre d’educacion infantila e primària mès gran dera Val d’Aran, tanben a perdut un mèstre/a, en tot quedar tamb ua plantilha de 39 mèstres en totau, e tot e qu’era plantilha poderie aumentar en seteme, aguesta retalhada se hig ara que dejà patic aguest centre eth curs passat e qu’Unitat d’Aran ja denoncièc".

D’auti centres, coma es de Salardú e Bossòst, tanben an vist redusides es sues plantilhes tad aguest pròplèu curs escolar.

UA considère qu’aguesta decision "agrèuge ua problematica de massificacion enes aules e mensprede eth reconeishement dera nòsta singularitat e, en cap cas ten en compde er aument de matricules que cada an i a quan comence era tempsada d’esquí”, manifèste Maria Vergés, conselhèra generau deth partit e hig que “era Val d’Aran a ua idiosincràcia fòrça concrèta que justifique pleament qu’aguestes retalhades de professorat non se realizen, ua singularitat que se ve dirèctament atacada damb aguestes retalhades”.

A principis deth cors passat, Unitat d’Aran ja denoncièc era retalhada de professorat que s’amiaue e tèrme en Aran quan en Catalunya se començaue eth cors damb mès professorat qu’er an anterior. En aguest sens, Vergés declare que “non comprenem coma eth Conselh Generau d’Aran e eth Sindic d’Aran non an dit arren ath respècte en tot seguir ena linha de non deféner es interèssi des persones que viuen e trabalhen en Aran”.

IMATGE: INSTITUT D'ARAN