Un gojat francés se trape de cara damb ua ossa damb tres cadèths en Montgarri

21/08/2018

Aguest maitin entàs 11 ores un grop de 4 excursionistes francesi an alertat sus era desaparicion d'un d'eri, de 22 ans, pròp deth Pujau de Barlongueta, Montgarri (Naut Aran).

Era causa dera desaparicion a estat era trobada deth gojat damb ua ossa damb tres cadèths que, dempús de brèus moments front a front a mens de 10m dera ossa, a causat era fuga deth gojat. Segontes a explicat eth gojat, era ossa a mantengut ua actitud defensiva, enquia qu'es cadeths an estat sufisentaments luenh, era les a seguit. Non a mostrat agressivitat ne a atacat ath gojat, mès s'a mantengut fèrma deuant des gèsti e es crits deth gojat enquia qu'es cadeths s'an aluenhat.

Seguidament eth gojat a escapat deth lòc en tot córrer montanha ensús e per aguest motiu es sòns companhs (entre eri eth pair e un frair) non ac an pogut localizar e an avertit ath 112 d'emergéncies. Quan eth gojat a arribat a un lòc damb cobertura telefonica a enviat era sua localizacion e estat rescatat rapidaments. En dispositiu an participat es Pompièrs d’Aran, era Unitat Aeriana des Agents Ruraus, es Agents de Miei Ambient deth Conselh Generau d’Aran e es Mossos d’Esquadra.

Segontes a explicat eth sindic d’Aran, Carlos Barrera, er excursionista s'a espantat ar interpretar qu'era ossa, qu'anaue acompanhada de tres cadèths, auie prenut era madeisha direccion de fuga qu'eth frair e que les volie atacar.

Es Agents de Miei ambient an trilhat era zòna damb gossets adiestradi e an pogut localizar peus dera ossa, que serviràn entara sua identificacion genetica, e recuperar quauqua fòto enes camèras de fototrampa pròplèus ena zòna. En aguestes camèras s'obsèrve ua ossa adulta que correspon fòrça probablaments ara qu’a causat er incident.

HÒNT: CONSELH GENERAU D'ARAN
Laura Rodríguez