Eth partit Unitat d'Aran (UA) denóncie eth "mensprètz e abandon" dera Generalitat de Catalonha damb er aranés.

Condemne era retalhada en un "40% des recorsi que destine tara lengua pròpria d’Aran, en tot passar des 100.000€ annaus que i destinèc en 2010, damb eth govèrn d’UA en Conselh Generau, as 60.000€ actuaus, tot e qu’eth pressupòst en matèria de politica lingüistica deth govèrn de Catalunya entath catalan supère es 22 milions d’euros".

UA manifèste que i a ua manca de respècte e d'interès per part deth govèrn catalan ara nòsta lengua pr'amor dera "drastica retalhada de recorsi, er emplec de varietats der occitan que non son era aranesa e era eliminacion premeditada dera denominacion istorica dera lengua pròpria d’Aran, er aranés, en totes es publicacions deth govèrn catalan en tot substituïr-la pera d’occitan, atau coma er hèt qu’era Lei der Aranés de 2010 encara non s’a desplegat".

Ath delà, tilden de "mala praxis" er hèt qu’era Generalitat age cambiat era denominacion dera lengua pròpria d’Aran, er aranés, per occitan o occitan d’Aran, e asseguren qu'aguest hèt "sonque a provocat confusion ath torn dera lengua, quan aguesta passe peth pitjor moment dera sua istòria, en tot èster a un 17% d’usatge sociau".

Maria Vergés, Conselhèra Generau d’UA, manifèste que “ei evident era identitat occitana der aranés, mès aquerò non ei rason entà qu’era nòsta varietat, aquera que, autant Generalitat coma Conselh Generau, an de protegir e potenciar, sigue acornerada e menspredada d’aguesta forma” e hig que “es darrèri ans auem vist coma era Generalitat retalhaue es recorsi tar aranés e substituïe de forma intencionada eth nòm d’aranés peth d’occitan sense avalorar er impacte qu’aquerò supause en ua lengua fragila e en perilh coma era nòsta atau coma er enòrme risc de desafeccion des parlants, que reconeishen era sua lengua a trauès deth nòm damb que l’an coneishut tostemp”.

Entà Unitat d’Aran, "eth govèrn dera Generalitat s’a apropriat dera denominacion dera lengua pròpria d’Aran, ua apropiacion que correspon unicament ath pòble aranés".

Eth partit afirme que des an reclamat en nombroses ocasions ua rectificacion d’aguesta mala praxis, autant en plen deth Conselh Generau coma en d’auti airaus. “Era incapacitat deth Sindic d’Aran entà exigir respècte pera lengua pròpria d’Aran e ath pòble aranés ei constatada” afirme Vergés “ua incapacitat entà deféner es interèssi des aranesi que tanben se manifèste ena manca de projècte tar aranés e tath país”.

Considèren qu’es responsables dera politica lingüistica en Catalunya "aurien de dimitir pr’amor qu’utilizen er aranés coma un esturment politic ath servici des sòns interèssi partidaris e non empleguen es recorsi e estrategies de besonh entà preservar-lo e impulsar-lo".

“Era nòsta lengua pròpria, er aranés, ei probablament eth màger signe d’identitat que possedim e, actuaument, ei mautractat de forma constant peth govèrn catalan. Calerie demanar-se qué passarie s’aguest mautracte l’amièsse a tèrme eth govèrn der Estat respècte deth catalan”, declare Vergés.