Trasladades es pròves de conduccion en Vielha a causa dera grèva dera DGT

04/08/2017

Era grèva d'examinadors dera Direccion Generau de Trafic (DGT) qu'aurà lòc a compdar deth 4 de seteme obligarà a suspéner totes es pròbes de conduccion en Vielha.

Aguesta mesura obligarà a aqueres persones que s'auessen de presentar a aguest examen en Vielha a trasladar-se enquiara Pòbla de Segur, damb era fin de concentrar a toti es examinats en un madeish lòc, un problèma agreujat pera manca de transpòrt entre es territòris. 

Per aguest motiu eth baile der Ajuntament de Vielha e Mijaran, Juan Antonio Serrano, s'amassèc damb es responsables dera DGT de Lhèida. Serrano volèc mostrar era sua preocupacion pr'amor que "resulte fòrça dificil entà un territòri coma eth nòste desplaçar-mos enquiara Pòbla de Segur ja que non existís cap tipe de servici de transpòrt public dirècte".

Ath delà, volèc restacar tanben qu'aguest "non ei eth prumèr còp qu’era Val d'Aran se demore ath marge des solucions aufrides peth govèrn, tant a nivèu de servicis coma de infrastructures. Des der Ajuntament de Vielha e Mijaran seguiram en contacte permanent damb era DGT entà que mos informen de totes es nauetats que i age referent ara grèva, e demoram qu'arriben a un acòrd entà poder seguir aufrint en nòste municipi un servici tan necessari entara nòsta poblacion”.

IMATGE: PEXELS.COM
Clara Villar