S'apròven es modificacions tecniques entà acabar d'elaborar eth document de protocòu sus eth comportament des ossi reintrodusidi

18/09/2018

Eth debat der os torne a protagonizar eth darrèr plen deth Conselh Generau. En aguest sens, s'an aprovat es modificacions tecniques entà acabar d'elaborar eth document de protocòu sus eth comportament des ossi reintrodusidi.

Uns actors que, amassa damb er estat francés, les calerie èster d'acòrd damb aguest protocòu entà procedir ara repatriacion der os Goiat, er exemplar mès conflictiu qu’a en pè de guerra a tota era Val d’Aran.

Tanplan, eth grop d'Unitat d'Aran a portat eth tèma mès enlà e a prepausat transportar aguest document en Parlament de Catalonha entà que se pogue debàter.

Un aute des ahèrs tractadi en Plen a estat eth besonh d'auançar ena regulacion des licéncies d'abitatges d'usatge toristic. Quauquarren qu'afècte tant ath sector dera ostalaria coma es madeishi abitants dera Val que viuen de loguèr.

Ath delà, tanben s'an tractat es grèus conseqüéncies der esbauçament deth passat mai en Valarties, qu'afècten negativaments ara salut der arriu Garona e ath sòn ecosistèma.

Un ahèr que se demore que se solucione ben lèu, non sonque entà sauvar era fauna der arriu e acabar damb er impacte paisatgistic dera aigua enhangada, senon tanben entà esvitar quinsevolh aute esbauçament que pogue méter en risc era vida des persones que tant passen pera pista de Valarties.

Laura Rodríguez