Eth Conselh Generau d’Aran a iniciat eth sòn projècte de melhores e manteniment de camins ena Val d’Aran, un projècte dotat d’un pressupòst de 150.000 euròs, e damb eth quau s’adequarà eth tram dera Pista de Varradòs entre era Bòrda des de Perú (Bagergue) e eth Pònt de Varradòs ath Saut deth Pish, un tram que compde damb un totau de 14,2 km.

Aguesta actuacion a estat subvencionada peth Departament de Vicepresidència i Polítiques Digitals i Territori dera Generalitat de Catalunya, laguens dera linha d’actuacions de melhora e manteniment de camins der hilat vesiau e rurau enes comarques de montanha e en Aran en 2021. Era actuacion en aguesta pista ère fòrça de besonh pr’amor que se tracte d’un camin d’accès a un punt de gran interés naturau e toristic coma ei eth Saut deth Pish e qu’enquiara se trapaue en un estat fòrça maumerent pr’amor dera erosion dera nhèu e er aigua.

S'a fresat tot aguest parçan e tanben s’a hèt ua escuelhèra entà reafirmar eth solèr. Eth tèrme d’execucion d’aguesta accion aurie d’acabar enguan abans qu'arriben es prumères nhèus. Era pista de Varradòs ère ua zòna que dificultaue er accès as veïculs que non auien 4x4 e ara damb aguesta actuacion se daurirà eth ventalh a d’auti usatgèrs.