Prumèrs educadors mediambientaus titoladi ena Val d’Aran

27/04/2019

Era directora dera ETEVA, Núria Perramon, e representants deth burèu deth SOC en Vielha, an autrejat es prumèrs certificats oficiaus de:  INTERPRETADORS E EDUCADORS AMBIENTAUS que s'an format e titolat en centre d'ensenhament deth Conselh Generau d'Aran.

Aguesta prumèra promocion ei formada per onze joeni dera Val d’Aran qu'an realizat era formacion pendent er an 2018. Era formacion compde de 500 ores a on se premanís as alumnes entà guidar grops e informar sus eth medi ambient e es sòns valors etanben era capacitat entà trabalhar coma guida interpretador, guida ambientau o monitor d'educacion ambientau entre d'auti.

Eth cors, subvencionat peth SOC e peth Hons Europèu, compde de quate mòduls. Un prumèr a on se trabalhen activitats d'orientacion e creacion d'itineraris en medi naturau e urban. Ara seguida s'estúdie era estructura deth medi ambient: fauna, flòra, ecologia e interpretacion deth païsatge. Er impacte der òme en medi e era sua conseqüéncia s'analise en tresau mòdul, e entà finalizar, en darrèr mòdul, se faciliten esturments pedagogics e didactics entà pr'amor de saber desvolopar programes d'educacion ambientau.

En paraules dera directora dera ETEVA, Núria Perramon: “En uns moments a on eth cambi climatic ei notícia e eth besonh de dar un torn important e accelerat dera activitat der òme sus era tèrra entà poder conservar-lo ei urgent era existéncia d'aguesti educadors qu’an de transméter es valors ambientaus ara societat ei imprescindible. Ei per açò, qu’era ETEVA torne a convocar un nau cors gratuït damb inici eth pròplèu mes de mai”.

HÒNT: CONSELH GENERAU D'ARAN

Laura Rodríguez