Tot e qu’ara era situacion tendís a normalizar-se, er aigua der arriu Garona a presentat pendent aguest darrèr mes e miei un color marronós que arren a a veir damb es tonalitats transparentes as que mos a acostumadi. Un color originat pera grana quantitat de hanga e materiaus qu’er arriu Valarties a portat ath Garona dempús der esbauçament qu’auec lòc en mai e que mos balhèc aguestes impressionants imatges.

Un ahèr que se debatic en darrèr plen deth Conselh Generau d’Aran.

Era solucion passarie pera construccion d’un mur de contencion, era canalizacion deth barranc e era reforestacion dera zòna afectada per esbauçament damb er objectiu d’esvitar er augment deth con deth barranc. Ues accions qu’a de amiar a tèrme era Confederacion Idraulica der Ebre com autoritat competent. 

Dessús dera taula se trape era installacion d’uns sensors qu’informarien sus era carga que patís eth terren coma conseqüéncia de fenomens naturaus coma es precipitacions intenses o era fusion dera nhèu.

Ath delà der impacte paisatgistic der arriu en aguestes condicions, un aute des ahèrs que preocupe ara societat aranesa ei era afectacion que pòt auer aguest fenomen ena fauna der arriu, e mès concretaments enes cavilats o trueites deth país coma espècies endemiques.