Morís er esquiaire que se trapaue critic en èster atrapat per un laueg dehòra de pistes en Baqueira

04/03/2020

Un des esquiaires qu’ager demorèc atrapat per un laueg dehòra de pistes en Baqueira/Beret a mòrt en Espitau Arnau de Vilanova de Lhèida dempús des grèus herides provocades per accident

Se tracte d’un joen de 24 ans de Palma de Malhòrca qu’ager s’aventurèc a esquiar pera zòna de Vinheta amassa damb dus companhs mès

Un des companhs siguec atengut per policontusions en Espitau Val d'Aran, mès eth sòn estat non ei pas grèu, e er aute acompanhant non resultèc herit.

Arrebrembam qu’er avís se dèc ager pòc abans des 15 ores, quan onze efectius deth GRM en collaboracion damb personau de Baqueira trabalhèren pendent mès d’ora e mieja en rescat.

Era zòna de Vinheta, dehòra deth domeni esquiable de Baqueira ei un punt fòrça perilhós. Atau ac constaten es darrèri accidents mortaus enregistrats en madeish lòc: un en gèr deth 2019 e un aute un an abans. Accidents a on dus esquiaires perderen tanben era vida.

Era Val d’Aran, que se trape calada en plen temporau, a establit eth nivèu de perilh de lauegi en tres sus cinc, damb çò que se recomane fòrça de precaucion

Laura Rodríguez