Inaugurada era exposicion des fotografies deth concors "Vilamòs, Tiò, Natura e Cultura!”

02/09/2018

Era associacion Es Paums a inaugurat era exposicion des fotografies arrecebudes ena prumèra edicion deth concors “Vilamòs, Tiò, Natura e Cultura!” qu’era madeisha associacion a organizat pendent aguest ostiu. En acte, qu’a agut lòc en Ecomusèu Çò de Joanchiquet de Vilamòs, s’a hèt eth liurament des prèmis as dètz finalistes e ara fòto mès originau.

Un jurat de 9 persones, des quaus 5 èren dera Junta directiua dera associacion des Paums e es auti 4, persones restacades damb eth mon dera fotografia, an escuelhut es imatges guanhadores. Pablo Arancibia, Antoni Morlans e Jordi Soler an artenhut es prumères posicions.

Aguest projècte s’encastre laguens deth programa qu’era associacion des Paums realize entara promocion dera tèrra aranesa, e mès concretaments deth pòble de Vilamòs, que arrebrembem, guanhèc er an passat eth concors deth pòble mès polit, convocat peth diari SEGRE.  

Laura Rodríguez