Eth Ministèri de Foment espanhòu a emetut a informacion publica eth projècte de reforma dera N-230 entre Sopeira e eth Tunèl de Vielha. Un projècte qu’a dues alternatiues: ua avalorada en 295 milions d’èuros e era dusau avalorada en 363 milions d’èuros. Des deth Conselh Generau d’Aran s’a estudiat aguesta prepausa de reforma e considèren tanplan grèu que Foment age obviat eth transit deth transpòrt pesat, sustot de cara ara termièra damb França.

Foment contemple eth bastiment de diuèrsi trams de tres carrils tà poder favorir es auançaments as veïculs pesats e esvitar longues coes. Cada tram aurie mens de dus quilomètres de longitud. Eth Conselh cre qu’ei insufisent, e en demane dus trams de quate quilomètres.

Per tant, ara se daurís un periòde de temps en quau Foment estudiarà es allegacions que se li poguen hèr des dera Val d’Aran e era comarca dera Alta Ribagorça abantes non prengue ua decision definitiua.

D’aute biais, en tot profitar era proïbicion de circulacion deth transpòrt pesat a compdar dera localitat francesa de Saint-Beat, eth Conselh amie a tèrme un estudi mediambientau entà saber er impacte acüstic que i a ena N-230. Es resultats d’aguest estudi les coneisheram enes pròplèus setmanes.