Pendent era passada setmana retornèc ara Val d’Aran era imatge restaurada dera Mair de Diu de Casarilh, ua escultura en husta policromada d’estil gotic. Era intervencion de restauracion a estat promoguda peth Conselh Generau d’Aran, compdant damb ua subvencion dera Generalitat de Catalunya, e s’a desvolopat en dues fases pendent es ans 2018 e 2019.

Ena prumèra fasa, desvolopada en 2018, ath delà d’ua desinfeccion, s’amièren a tèrme diuèrses cales e radiografies que meteren de manifèst era existéncia de policromia subjacenta  originau e era  nauta qualitat deth trabalh de talha emmascarat dejós d’ua espessa cocha de repintat. 

Ena dusau fasa damb era eliminacion deth repintat  s’a podut  comprovar era bona conservacion dera policromia originau e confirmar era pertanhença dera òbra ath grop escultoric deth nomentat Talhèr de Comenge que se desvolopèc en airau der antic Bisbat de Comenge entre es sègles XIII e XIV, en tot introdusir er estil gotic en parçan.

Era imatge dempús d’auer-se presentat dimèrcles as vesins e ath rector dera parròquia de Casarilh se poderà admirar pendent un temps en Musèu dera Val d’Aran.

HÒNT: CONSELH GENERAU D'ARAN