Eth conselhèr de Trabalh, Ahèrs Sociaus e Familhes dera Generalitat de Catalonha e eth sindic d’Aran, an signat un acòrd de cofinançament dera futura residéncia geriatrica de Les.

En aguest sens, era Generalitat aportarà 452.000 èuros entath manteniment de 30 places residenciaus e 10 de centre de dia.

Tot e qu’era prevision ei qu’enquiath 2020 non se i pogue aufrir servici ena residéncia, eth procés d’òbra auance avientament.

Er objectiu d’aguest projècte ei, segontes era administracion, garantir er envielhiment quilomètre 0, ei a díder, en entorn fisic, sociau e psicologic de cada persona.

Eth Conselh Generau d’Aran ei qui execute completaments es òbres de bastiment dera naua residéncia geriatrica damb un pressupòst de 2 milions e miei d’èuros.

Ath delà, cau arrebrembar qu’era residéncia Sant Joan de Les compdarà damb 60 places, des que 30 ne seràn de residéncia assistida publica e 30 privades, ath delà de 20 places mès de residéncia de dia.

En aguest sens, era residéncia de Les serà tanben generadora de naui lòcs de trabalh en Baish Aran.

Per un aute costat, er acòrd tanben preve un ampliament dera dotacion economica destinada ath Servici d’Atencion Domiciliària (SAD) que s’aplicarà a mesura qu'eth Conselh Generau d’Aran tanben aumente era prestacion d’aguest servici.