Eth cabau der arriu Garona, jos minims

04/01/2019

Dempús der episòdi der aigua torbelhada der arriu Garona, arribe un aute: eth cabau der arriu aranés ei darrèraments jos minims. Un fenomen qu’està ocasionant damatges ena fauna e en paisatge dera Val d’Aran.

Des deth Conselh Generau d’Aran s’allegue qu’eth problèma radique en qu’era autoritat en aguest ahèr, qu’ei era Confederacion Idrografica der Ebre, non a establit quin ei eth cabau ecologic ena Garona.

Eth cabau ecologic ei era mesura de litres per segon d’aigua que baishe per un un arriu que permet mantier, coma minim, era vida des peishi que de manèra naturau abiten en un arriu, atau coma era vegetacion dera sua ribèra.

Aguest cabau ei espaciauments agonic enes zònes a on era Garona ei mès ampla, coma en sòn pas peth pòble de Bossòst. Er impacte visuau non pase bric desapercebut. 

Era situacion ei plan preocupant, ja qu’ena Garona i abiten especies animaus endemiques coma ei eth cas deth cabilat.

Peth moment, se demorarà a qu’era Confederacion Idrografica der Ebre balhe ua responsa çò de mès lèu possible, entà qu’es afectacions ara fauna, ath miei ambient e ath paisatge dera Val d’Aran non s’incrementen.

Laura Rodríguez