Era Generalitat ratifique eth nau modèl de finançament d'Aran

11/03/2019

Eth conselh executiu dera Generalitat de Catalonha, celebrat per prumèr còp ena Val d’Aran, a ratificat eth nau modèl de finançament deth Conselh, mesura prevista ena Lei de Regim Especiau d’Aran de 2015.

Eth Sindic d’Aran, Carlos Barrera, a destacat era capacitat de negociacion d’ambdues institucions entà arténher tant aguest acòrd de finançament coma d’auti besonhs de fòrça importància tath territòri, maugrat era actuau situacion politica en Catalonha.

Pera sua part, era oposicion deth Conselh Generau non s’a mostrat pas tant satisfèta damb eth govèrn dera Generalitat pera, asseguren, “manca de contengut institucionau e politic dera madeisha, mès enlà dera fotografia e er eslogan”.

Ena arròda de premsa concedida dempús der executiu, a estat era Conselhèra de presidéncia dera Generalitat, Elsa Artadi, era encargada de dar mès detalhs sus aguest nau modèl de finançament d’Aran

En tot hèr servir er aranés, eth President deth govèrn catalan, Quim Torra, s’a mostrat content pes acòrds artenhudi e a soslinhat qu’eth benèster d’Aran beneficie a tota Catalonha.

Per ara, manque barrar aguest acòrd de finançament en marc dera amassada bilaterau deth Conselh Generau e era Generalitat.

Clara Villar