Era Deputacion de Lhèida s’a ahigit ath refús ara senténcia deth Tribunau Constitucionau que suspenia era preferéncia der emplec der aranés ena administracion publica. En aguest sens, aprovèc ua mocion d’Esquerra Republicana de Catalunya e que compdèc damb eth supòrt deth grop d’Unitat d’Aran, coma comente eth sòn deputat Paco Boya.

Era Deputacion tanben aprovèc ua mocion presentada pes grops d’Unitat d’Aran e eth PSC entà garantir eth sistèma public des pensions dempús de veir es fòrtes manifestacions que i a agut en Espanha, contra era pèrta de poder adquisitiu e era baisha revalorizacion des pensions, avalorada en un 0,25%.

Fin finau, Unitat d’Aran e eth PSC tanben presentèren ua mocion aprovada peth plen, en tot balhar supòrt ara grèva feminista deth pròplèu 8 de març que demane era igualtat laborau e salariau entre es òmes e es hemnes.