Era aranesa Mireia Boya dèishe era direccion dera CUP per ua supausada agression psicologica d'un companh

29/03/2019

Era aranesa Mireia Boya a anonciat aguest diuendres a trauès deth sòn compde de Twitter que dèishe eth Secretariat Nacionau dera CUP e dèishe era politica nacionau entà préner "aire e fòrces".

Era exdiputada en Parlament revèle que pendent eth sòn periòde coma deputada sofric un "episòdi contunhat d'agression psicologica" per part d'un companh que li a supausat ua gestion emocionau complicada qu'encara ei daurida. Boya a explicat que damb era dificultat dera darrèra legislatura peth referendum deth 1-O e era posteriora "repression" der Estat decidic amagar es problèmes de salut.

Ara, maugrat açò, ath coïncidir de nau damb aguesta persona arrebrembe es "comportaments agressius" e "ròtles de poder", e a decidit deishar era politica e "suenhar-se". "Marchi conscient de deishar eth rèpte collectiu de melhorar era gestion des agressions maschistes", a afirmat.

Pera sua part, era CUP a emetut un comunicat a on s'explique qu'era comission feminista dera organizacion a apletat era denóncia de Mireia Boya e que se compromet a seguir en tot trabalhar "damb mès fòrça se cau" entath bastiment d'ua organizacion que sigue un espaci de participacion "segura" entàs hemnes e totes es persones.





HÒNT: SEGRE.COM
Laura Rodríguez