Er Ajuntament de Vielha e Mijaran poderà invertir eth superavit artenhut pendent er exercici deth 2018 en inversions finançerament sostenibles.

Atau s’a comunicat en darrèr plen ordinari dempús de qu’eth consistòri age arrecebut era corresponenta notificacion, per part deth Ministeri d’Isènda.

D’aguesta forma, era administracion estatau trabalhe ena aprobacion dera norma legau que permeterà ua prorròga dera destinacion d'aguest superavit as administracions locaus.

Arrebrembam qu’er Ajuntament de Vielha e Mijaran acabèc er exercici deth 2018 damb un superavit de mès de 670.000 èuros, des quaus, se calcule que 400.000 se poderien dedicar a inversions.

En cas der Ajuntament deth cap-lòc aranés, tot indique a qu’ua part importanta d’aguestes inversions se destinaràn ara milhora des dipòsits d’aigua deth municipi.

En aguest plen ordinari tanben s’a aprovat era mocion de supòrt as jubilats des companhies electriques pes retalhades sociaus que se vòlen aplicar. Sonque ena Val d’Aran i aurien afectades mès de 120 familhes.