Er Ajuntament de Vielha e Mijaran destinarà 479.000€ a Inversions Financerament Sostenibles

25/04/2019

Era session extraordinària deth Plen der Ajuntament de Vielha e Mijaran a aprovat era 2a modificacion de credit deth pressupòst de 2019.

Aguesta, se poderà executar gràcies ath superavit artenhut est an passat e gràcies ath decrèt estatau que permet as ajuntaments destinar aguest excedent a Inversions Financerament Sostenibles.

Er Ajuntament deth cap-lòc d'Aran barrèc er exercici 2018 damb un excedent de mès de 670 mil èuros €. Damb aguesta modificacion de credit se destinaràn 479.000 èuros a Inversions Financerament Sostenibles.

Laguens es inversions financerament sostenibles, tanben s'amiarà a tèrme eth bastiment d'ua pista poliesportiva exteriora ath costat dera actuau pista de pàdel deth Palai de Gèu de Vielha. Ua installacion que permeterà qu'es joens deth municipi agen un espaci a on poder practicar espòrts ar aire liure.

D'autes accions que hèn part d'aguesta modificacion de credit son era renovacion des biciclètes de spinning e es desumificadors deth Palai de Gèu.

Tanben s'amiarà a tèrme ua melhora des quadres electrics der enlumenat public, e s'autrejarà ua subvencion tà qu'eth pòble de Mont pogue auer un parc infantil enes condicions avientes entara mainadèra.

En mai se celebrarà eth darrèr plen d’aguesta legislatura, e eth baile de Vielha e Mijaran ja a començat a hèr avaloracion des 4 darrèri ans ath cap der Ajuntament deth cap-lòc aranés.

Pendent eth plen, era oposicion siguec plan critica en çò que tanh ara gestion qu’eth consistòri a hèt damb eth palai de Gèu, que demore barrat des deth passat junh a causa d’ua greu pana.

Des dera casa dera Vila s’apunte a que propròplèuments arribarà a Vielha era pista de gèu movil, frut d’un acòrd ath qu’er Ajuntament de Vielha a arribat damb er Ajuntament de Barcelona.  

Laura Rodríguez