Eth Conselhèr de Territòri e Sostenibilitat dera Generalitat de Catalonha, Damià Calvet, a mantengut ua amassada damb eth Sindic, Carlos Barrera, e diuèrsi conselhèrs deth Govèrn d’Aran. S'i an tractat temes tan importants coma era situacion des ossi en territòri e era politica d’abitatge.

En aguest sens, es postures dera Generalitat e deth Conselh an arribat ar acòrd de dar lum verda ath procediment tecnic e juridic entà exportar ar os Goiat, comprenent qu’eth sòn comportament anomal resulte incompatible damb era activitat umana en territòri.

Un aute des punts que preocupen en país ei er augment d’exemplars d’ossi pendent aguesti darrèri ans, un hèt que impedís determinar un numerò exacte dera poblacion d’ossi en territòri. Per açò, des dera Generalitat, se vòlen préner mesures.

Es problematiques non acaben aquieu. E ei que ath colièr damb GPS incorporat que er ós Goiat pòrte se li està acabant era bateria.

Ath delà, deuant der increment generalisat des prètzi des loguèrs ena Val d’Aran, en aguesta amassada s’a decidit trebalhar entà revertir aguesta situacion. En aguest sentit, se preten estudiar eth mercat aranés entà començar a hèr promocion publica de viuendes de loguèr sociau. E, tanben, se començaràn es tramits entà qu’eth Conselh Generau d’Aran pogue arténher plenes competéncies ena emission d’informes sectoriaus enes expedients urbanistics.