Eth darrèr plen deth Conselh Generau d'Aran a aprovat per unanimitat era creacion dera licéncia de pesca aranesa. Un document que facultarà as beneficiaris a pescar enes arrius dera Val d'Aran.

En cas que se volgue pescar dehòra des limits territoriaus aranesi, eth tramit entà arténher era licéncia serà diferent e lo gerirà era Generalitat de Catalonha.

Totun, damb aguesta aprobacion, serà eth madeish Conselh Generau d'Aran qui arreceberà dirèctaments es ingrèssi dera taxa d'expedicion de permís de pesca recreativa ena Vau d'Aran.

Totes es licéncies coïncidiràn damb es que concedís era Generalitat de Catalonha atau coma eth regim sancionador entàs pescadors que realizen era activitat sense licéncia.

Ua decision que s'a prenut dempús qu'era Generalitat traspassèsse era competéncia dera gestion de caça e pesca en Govèrn Aranés.

D’auta banda, practicaments era totalitat des ingrèssi d'aguesta taxa de gestion de licéncies anarà destinada ara Associacion de caça e pesca d’Aran. Ua entitat que cada an arrecep uns 15.000 èuros d'ajuda.

En aguest sens, eth Conselh Generau d’Aran concedic en 2018 un totau de 691 licéncies per un impòrt de 14.132,00 €.

Ath delà, s’an comptabilizadi en torn a 400 caçaires e pescadors ena Val d’Aran.