Eth passat diuendres, eth Sindic d'Aran, Carlos Barrera, e eth secretari d'Infrastructures e Mobilitat deth departament de Territòri e Sostenibilitat dera Generalitat, Ricard Font, s'amassèren ena sedença deth Departament entà tractar diferents ahèrs relacionats damb era N-230.

Eth Sindic liurèc a Font er estudi elaborat peth Conselh a on s'estúdien es milhores de besonh en aguesta carretèra des deth Pas d'Aran enquiara boca sud deth Tunèl de Vielha, estudi dejà presentat ara Deputacion de Lhèida e d'auti Ajuntaments afectats peth traçat dera nacionau.

S'arribèc ar acòrd de presentar allegacions conjuntes entre Territòri e Sostenibilitat e Conselh Generau ar estudi informatiu deth Ministèri de Foment, que contemple era milhora de 45 quilomètres entre Sopeira e era boca sud deth Tunèl. Rebrembam qu'aguest estudi se trape en periòde d'informacion publica enquiath 8 de març. 

Entre d'auti aspèctes, Conselh e Generalitat demanaràn a Foment ahíger ar estudi de melhores dera carretèra eth tram que va des Pas d’Aran enquia Sopeira, tram qu'er estudi deth Ministèri dèishe dehòra.

Auta des peticions per part deth Govèrn aranés ei arténher eth supòrt dera Generalitat as allegacions presentades des d’Aran. 

IMATGE: CONSELH GENERAU D'ARAN