Eth Plen der Ajuntament de Vielha e Mijaran non acostume a artenhér unanimitats enes punts deth sòn orde deth dia. 

Aué, totun, a estat un d’aqueri dies pòc abituaus: autant era equipa de govèrn d’Unitat d'Aran com Convergéncia Aranesa an aprovat ua mocion entà demanar ara Generalitat mesures especifiques de contencion dera COVID-19 enes territòris de montanha. 

En aguesta mocion i an prenut part, atau, diuèrsi muncipis e conselhs comarcaus deth Pirenèu.

En çò que tanh ath cas concrèt d’Aran, son diuèrsi es punts sus es que se vò debàter damb era Generalitat. 

En aguest sens, çò que se demane ei eth confinament comarcau, pr’amor que pera natura des municipis d’Aran, bona part des sòns abitants an de besonh desplaçar-se a d’auti municipis entà poder accedir ara majoria de servicis basics. 

Se demane, d’aguesta manèra, qu'es territòris de montanha siguen escotadi ena prenuda des decisions restacades damb es restriccions de mobilitat de Catalonha.