Finalizen es òbres d'adeqüacion der elipòrt entà que pogue operar es 24 ores

20/10/2018

Er elipòrt dera Val d’Aran compde dejà damb un servici de 24 ores dempús d'auer-se completat es òbres d'adeqüacion dera pista. Aguesta infraestructura acuelhie enquia ara operacions deth Servici d'Emergéncies Medicaus, rescats de montanha, avitualhament de refugis de montanha, vòls toristics diürni e trabalhs aeriani en nauta montanha. Damb es naues accions realizades s'a melhorat era sua capacitat entà balhar contunhitat ad aguestes operacions e acuélher d'autes naues en orari nocturn.

Un còp abilitat eth servici de 24 ores ena pista der elipòrt aranés, er aute pas ei eth bastiment d'un nau hangar damb capacitat entà 3 elicoptèrs. Un ampliament que permeterà incrementar eth servici e era sua qualitat e, ath madeish temps, dignificar era infraestructura.

Per aute costat, se reformaràn es espacis interiors der actuau hangar entà que se pogue emplegar com zòna de servicis e sala de gestion d'emergéncies. Tanplan, se bastirà ua plataforma de parcatge en un terren adjacent.

Laura Rodríguez