Era Val d'Aran, sedença des PAU per prumèr viatge ena istòria

07/07/2020

Era Val d’Aran s’a convertit per prumèr viatge ena istòria en sedença des Pròves d’Accés ara Universitat.

Uns examens que realizaràn en Institut d’Aran pendent 4 dies ua seishantia d’alumnes. 14 d’eri vengudi deth Pònt de Suert,  2 qu’èren assignadi en tribunaus de Lhèida e que finauemnts realizaràn era selectivitat en Aran, e coma non, er alumnat aranés.

Toti eri s’an mostrat satisfèts per hèt de non auer-se de desplaçar aguesti dies tà hèr era selectivitat.

Alegror tanben en Institut d’Aran, qu’amassa damb er alumnat e es autoritats politiques d’Aran demanen qu’era realizacion des PAU en país non sigue sonque de forma puntuau, senon permanenta

En çò que tanh as mesures de prevencion dauant era pandèmia, era mascareta a estat obligatòria e tanben s’an plaçat diuèrsi dispensadors de gel idroalcoòlic en Institut.

Cau arrebrembar qu’era oficialitat dera lengua aranesa permet qu’er alumnat pogue respóner en aranés en totes aqueres pròves que non siguen estrictaments matèries de lengua. Ath delà, enguan s’aufrís era opcion d’escuélher er enonciat dera pròva d’Istòria en aranés

Laura Rodríguez