Ager auec lòc en Madrid era amassada entre eth secretari d’estat de Miei Ambient, Hugo Morán, eth sindic d’Aran, Francés Boya, eth conselhèr de Territòri dera Generalitat, Damià Calvet, e eth conselhèr de Desvolopament Rurau e Sostenibilitat d’Aragon, Joaquín Olona, entà tractar era problematica que supause eth comportament predador de determinadi ossi en aguesti territòris.

Aguest ei eth prumèr còp que se hè ua amassada a aguest nivèu entà tractar questions qu’afècten ara reintroduccion des ossi e, coma dejà auie manifestat prèviament, eth sindic d’Aran a exigit era extraccion d’aqueri exemplars damb un comportament reiteradament predador, coma ei eth cas de Cachou o Goiat, e que impossibiliten era convivéncia d'aguesta espècia damb era ramaderia en Aran. En aguest sens, s’a artenhut eth compromís entà agilizar era retirada deth miei des ossi conflictius.

Pendent era amassada s’an detectat quini son es aspèctes que condicionen era agilitat des administracions ara ora d’actuar deuant es ossi conflictius e s’a plantejat era modificacion deth Protocòl d’Intervencion damb Ossi enes Pirenèus entà garantir ua presa de decisions mès rapida e efectiva.

Tanben s’a acordat era creacion d’un grop de trabalh interadministratiu que permete facilitar era cooperacion entre eth Ministèri entara Transicion Ecologica, eth Conselh Generau d’Aran, era Generalitat de Catalonha e era Deputacion Generau d’Aragon, atau coma afrontar es disparières situacions que genère era gestion dera convivéncia entre es ramadèrs e es ossi. Aguest grop de trabalh tanben aurà d’abordar era armonizacion des pagaments per damatges, qu’en aguest moment son mès nauti en França e Aragon qu’en Catalonha e Aran.

Eth sindic d’Aran a valorat positivament aguesta amassada a on a demanat ath secretari d’Estat “era maxima agilitat ena implementacion d’aguestes mesures, atau coma ua politica qu’afavorisque as ramadèrs e era sua preséncia en territòri pr’amor qu’era accion ambientau qu’amien a tèrme ei insustituible”.

HÒNT: CONSELH GENERAU D'ARAN