Eth passat deluns, 11 d'hereuèr, eth Conselh Generau d’Aran a acuelhec ua naua amassada deth Plan de refugis deth projècte ENTREPYR II, que forme part deth Programa de Cooperacion Territoriau Europèa INTERREG VA (Espanha-França-Andòrra) POCTEFA 2014-2020.

Aquiu s'i tractèren tematiques referents ad aguest Plan de refugis transfronterier, en encastres coma era modernizacion des refugis, bones e males practiques deth trabalh des guides, diagnostic e qualitat des refugis, gestion mieiambientau, seguretat e emergéncies, promocion, comunicacion e comercializacion, recomanacions des des burèus de torisme, e formacion des agents.

Concrètaments, en aguesta jornada se tractèc era creacion der observatòri des refugis des dera Universitat de Tolosa, damb informacion de sojorns, usatgèrs, servicis, e sus coma a d'èster eth sistèma d'enquèsta e procediment. Ath madeish temps tanben s'elabòre ua enquèsta/estudi sus eth tractament des aigües residuaus e des banhs shuts des refugis.

A trauès deth projècte ENTREPYR II, damb ua subvencion de 97.500 €, eth Conselh Generau d’Aran installarà es dus refugis de montanha dera Val d’Aran dus banhs shuts e dues potabilizadores entath tractament d’aigües residuaus.

A part d’aguestes melhores eth govèrn aranés tanben a previst destinar part d’aguesta subvencion ara melhora dera promocion e comercializacion des rotes de senderisme dera Val d’Aran atau coma era difusion dera madeisha via web.

POCTEFA ei un programa europèu de cooperacion transfronterièra creat entà fomentar eth desvolopament sostenible, atau coma entà refortilhar era integracion economica e sociau deth territòri de Catalonha que limite damb França e Andòrra, a trauès deth finançament de projèctes dessenhadi e geridi per organismes publics e privadi des dus costats des Pirenèus. Eth Programa se finance a trauès deth Hons Europèu de Desvolopament Regionau (FEDER).

IMATGE: CONSELH GENERAU D'ARAN