Amassada deth Conselh damb es responsables deth servici de recuelhuda de lordères

06/09/2019

Eth Govèrn d’Aran s’a amassat damb es responsables dera enterpresa Romero Polo, que gestione eth servici de recuelhuda de lordères ena Val d’Aran, entà analizar eth foncionament d’aguesta prestacion pendent eth mes d’agost.

Segontes es acòrds prenudi, eth Conselh ampliarà era partida deth conveni de lordères entà dar milhor responsa ath servici en conjunt deth territòri aranés.

Se realizarà tanben un mapa de punts critics e eth conselhèr de Territòri, Paisatge e Gesion ambientau, Oriol Sala, s’amassarà damb toti es alcaldes e alcaldesses d’Aran entà conéisher es deficits de cada municipi sensibles de milhorar.

Ath delà, s’a acordat era creacion dera figura desagents civics, que mejançant correspondéncia e amassades sajaràn de milhorar es mecanismes e abituds der usatge deth servici de recuelhudade residus, especialment enes grani productors. Ua accion que començarà coma ua pròva pilòt.

Atau coma afirme Sala: “ei important tath Conselh Generau qu’era Val d’Aran age un servici de recuelhuda de lordères agil e eficient, per aquerò auem marcat ues sessions de trabalh damb era enterpresa damb er objectiu d’afrontar era campanha d’iuèrn dera milhor manèra possible”.

HÒNT: CONSELH GENERAU D'ARAN
Laura Rodríguez