Era Val d’Aran se premanís tà acuélher en pòqui dies ua naua edicion dera Marxa Beret d’esquí de hons, era pròva per excelléncia en país. Enguan aguesta corsa arribe ara 39au edicion, e es pròplèus 3 e 4 de hereuèr aumpliràn de hondistes era pista de Beret damb corredors autant nacionaus coma deth nòrd d’Euròpa. Dissabte dia 3 aurà lòc eth Sprint Salomon, ua pròva que pendent es darrèri ans s’auie hèt en Arties, mès qu’enguan tornarà tà Beret tà mostrar era abilitat des hondistes. E dimenge dia 4, aurà lòc era Marxa Beret, damb es 3 distàncies abituaus: 10, 21 e 42 kms.

A compdar de hèr diuèrsi ans era Marxa Beret ei includida laguens deth circuit de pròves de longues distàncies dera FIS e enguan, tanben suposarà era Copa d’Espanha d’aguesta modalitat esportiua. Des dera organizacion son tanplan optimistes en obtier ua grana donada de participaires, en tot establir era chifra ath tor des 1000 corredors. Era pròva tot e non voler pérder eth sòn esperit popular, cada an artenh que fòrça corredors sustot nordics participen ena Marxa.

Entà amiar a tèrme es inscripcions ara pròva e tà auer mès informacion sus es diuèrses corses o es reglaments des madeishes, era organizacion a abilitat era plana web www.marxaberet.com. Encara manquen quauqui dies entà recéber aguesta pròva, qu’en 2019 ja celebrarà eth sòn 40au aniversari e que s’a establit coma er epicentre esportiu dera Val d’Aran.