Beret compdarà damb un nau telesquí entara pròplèu sason d’iuèrn. Er ajuntament de Naut Aran a dat lum verda de manèra provisionau ath bastiment d’aguest equipament en parçan deth Tuc de Baciver damb accès des d’Òrri e que suposarà era implementacion 3 pistes esquiables ath sòn entorn. Aguesta naua infraestructura serà era que mès nautada age Baqueira-Beret, en tot pujar des 2200 mètres enquiàs 2600.

Damb aguest nau telesquí Baqueira-Beret aumente eth limit esquiable en 100 mètres, en tot arribar ara còta 2600. Aguest nau equipament serà entà esquiaires que compden damb un bon nivèu d’esquí e se i arribarà a trauès deth telesquí deth Saumet. Per tant, Baqueira-Beret aurà un màger domeni esquiable, ath que s’aurà de híger eth teleserà de 3 places en Blanheuar que siguec aprovat en 2016.