Eth passat dissabte, 19 de gèr, se celebrèc ena estacion francesa de Les Arcs era prumèra corsa de 3 esteles deth circuit Freeride Junior Tour, a on es aranesi Abel Moga e Pòl Tellosa obtengueren era prumèra e quatau posicion, respectivament.

Ena corsa participèc era equipa aranesa dera Escòla Emotion formada per Abel Moga, Pòl Tellosa, Pablo La Grave  i Julián Puras.

Abel (18 ans) realizèc ua linha fòrça fluïda, era victòria siguec gràcies ath 360 que lancèc ena prumèra ròca, un lòc fòrça tecnic tad aguest tipe de trucs, ath delà acompanhèc era linha damb 3 ròques, ua d’eres era mès grana deth sector. Gràcies ad açò, Abel se place prumèr en circuit Europèu Oceanic.

“Anèrem un parelh de dies abantes tà veir eth sector dera competicion e estudiar es linhes. Venguiem d’esquiar en condicions fòrça dificils pera pòga nhèu e mos auíem d’adaptar. Mès adaptar-nos as bones condicions tostemp ei facil” a explicat er entrenador dera Escòla Emotion, Cristian Boiria, que hig que “decidirem escuélher era madeisha linha tàs tres (Abel, Pòl e Julián), pr’amor qu’ère era mès complèta e era que mès punts mos darie, mès non decidirem escuélher un 360 que sense cap dubte mos a dat era victòria. Quan Abel arribèc ara meta, me guardèc, arric e me diguec: Toma sorpresa. Arrí, l'abracè e per laguens, dejà sabie qu’auíem guanhat.”

Eth dusau lòc siguec tar anglés Xavier Thiébaud, aguest magnific rider hèc 2 corbes en tot eth sector e li treiguec 4 mètres de distància ath que mès sautèc, un meritòri pòdium. Eth tresau lòc siguec tath soís Maxime Chabloz madeisha linha qu’Abel mès eth 360 lo lancèc ena dusau pèira qu’ère mès petita. 

E en quatau lòc, er aranés Pòl Tellosa (17 ans), que realizèc ua des linhes mès polides. Comencèc daurint peada damb ua doble terrassa, planchèc perfècte e gessec dret en tot hèr un super speed, cerquèc ua diagonal a on sautèc un parelh de windlips que li dèren uns punts mès e dejà s’encarèc ara ròca mès grana deth sector, planchèc e s’encarèc a ua doble finau. Era  linha damb mès sauts e originala deth dia.

En femenin, guanhèc era soïssa Marie Bovard en esquí e era francesa Anna Martínez en snowboard. Er snowboard masculin siguec tath soís Eliote Danzer. 

Era pròplèu cita serà en La Clusaz es dies 2 e 3 de hereuèr.