Era corsa e caminada des 15 pòbles, organizada pes volontaris d'Aran, a artenhut enguan era 22aua edicion damb mès de 550 participaires.

S'i an organizat dues corses de 21 e 11 quilomètres e tres caminades de 21, 15 e 5 km.

Es recorreguts an caushigat 15 pòbles deth Baish Aran e deth Mijaran. Entre autes localitats, an passat per Arró, Vilamòs, Arròs, Aubèrt, Vila o Vilac. Er inici des competicions de major distància a debanat en Es Bòrdes e era mèta, en Vielha.

Era aranesa Marta Cester a guanhat era corsa de 21 mil mètres ena categoria femenina damb un temps de dues ores e nau menutes. Ena categoria d'òmes, Jordi García s'a emportat er aur damb un temps d'ua ora e 45 menutes.

Ena corsa de 11 km, Carlos Llerandi damb un temps de 55 menutes e Josune Vilumbrales, s'an pujat ar esglaon mès naut deth pòdium.

En aguesta jornada en qu’eth solei non a parat de lúder, tanben s'a celebrat era corsa Trofèu Roland Gine, qu'ei era carrèra Juvenila de 5 km, disputada des de Montcorbau enquia Vielha.

Era Còrsa e Caminada des 15 Pòbles ei ja ua activitat esportiua assolidada que des des sues origines cerque era recuperacion e preservacion des vielhi camins que junhien es pòbles aranesi. Ua forma immilhorabla de conjugar er espòrt e er auviatge naturau e istoric dera Val d'Aran.