Gran èxit deth Prumèr Hestivau de Senderisme dera Val d'Aran

18/07/2018

Pendent es dies 2 e 8 de junhsèga era Val d'Aran acuelhec era prumèra edicion deth Val d'Aran Walking Festival, organizat pera entitat Camins e eth Club Alpí Aranés, e qu'a estat tot un èxit d'assisténcia. 

Pendent aguesti dies, es participants non sonque poderen gaudir dera montanha e era activitat fisica, senon qu'ath delà s'organizèren actes culturaus, degustacions gastronomiques, cates de bièra, concèrts...

En aguest Hestivau de Senderisme dera Val d'Aran s'organizèren 16 excursions de senderisme de diferents nivèus enes quaus participèren 441 persones, 4 visites culturaus damb 117 participants e dues projeccions e observacion d'estèles damb 50 participants. En totau, i participèren 608 persones.

Eth nòste parçan acuelhec senderistes de diferents parts de Catalonha, Euskadi, País Valencian, Madrid, Andalosia, Gran Canaria, França... 

En aguesti actes i sigueren tanben presents es organizadors deth Gran Canaria Walking Festival e es der Hestivau de Senderisme d'Euskadid Puntaik Punta, qu'heren ua presentacion d'aguesti eveniments pendent er acte de clausura der hestivau aranés.

Aguest eveniment condèc damb eth patrocini de Torisme Val d'Aran, Conselh Generau e Ajuntament de Naut Aran. Ath delà, collaborèren tanben er Ajuntament de Vielha e Mijaran, eth de Bossòst, IDAPA, eth Parc Nacionau d'Aigüestòrtes, Pirineus e diuèrses empreses deth territòri: botigues esportiues, productors locaus, bars, restaurants, otèls e comèrci. 

Dempús deth gran èxit d'aguesta prumèra edicion, es organizadors se trapen dejà planejant eth Val d'Aran Walking Festival 2019.
Clara Villar