Pendent era darrèra dimenjada deth mes d'abriu, eth Palai de Gèu de Vielha a estat er scenari de diuèrses competicions nacionaus de patinatge sus gèu: eth Campionat d'Espanha, era Copa Federacion e era Copa d'Espanha de Ballet Infantil.

I participèren mès de 230 patinadors de tota Espanha, entre eri quauqui membres deth CEGVA.

Cau destacar especiaument eth magnific trebalh de Lucia Sánchez e Claudia Capdevila en Campionat d'Espanha Infantil, qu'artenheren era quatau e cincau posicion, respectivaments.

Eth còsso d'Espòrts de Vielha e Mijaran, Alberto López, se mostrèc fòrça erós per “coma a anat era organizacion d'aguesti campionats, a on s'a demostrat qu'eth municipi de Vielha e Mijaran ei capable d’acuélher competicions estataus de naut nivèu, en tot plaçar-mos coma ua destinacion esportiua d'iuèrn de referéncia en Espanha”.

Enguan, eth consistòri invertirà mès de 150.000€ entà milhorar es condicions deth Palai de Gèu. En aguest sens, destaque era inversion en maquinària, neteja, combustibles e eth sistèma de climatizacion, atau coma er enlumenat LED. Un seguit d'actuacions entà qu'aguest equipament contunhe en tot milhorar es sòns servicis entàs usatgèrs.

“Eth govèrn municipau de Vielha e Mijaran apòste peth Palai de Gèu coma ua installacion de qualitat referent ena Val d'Aran. Aguesta sason d'iuèrn auem acuelhut fòrça competicions de patinatge sus gèu, curling e hockey sus gèu, e trebalham entà qu'es pròplèus ans, ne pogam auer mès”, higís López.

IMATGES: CEGVA